ਤੁਸੀਂ ਇਸ ਸਫ਼ੇ ਦੇ ਉੱਤੇ ਭਾਸ਼ਾਵਾਂ ਦੀ ਸੂਚੀ ਦੇਖ ਰਹੇ ਹੋ ? ਅਸੀਂ ਗਲੋਬਲ ਵੋਆਇਸਿਸ ਦੀਆਂ ਕਹਾਣੀਆਂ ਇਹਨਾਂ ਸਾਰੀਆਂ ਭਾਸ਼ਾਵਾਂ ਵਿੱਚ ਅਨੁਵਾਦ ਕਰਦੇ ਹਾਂ।

ਗੇਮ ਆਫ਼ ਥਰੋਨਜ ਅਤੇ ਜਲਵਾਯੂ ਤਬਦੀਲੀ: ਤਕੜੇ ਹੋ ਜੋ, ਗਰਮੀ ਦੀ ਰੁੱਤ ਆ ਰਹੀ ਹੈ!

ਫੋਟੋ: ਪੀਐਕਸਹੇਅਰ (PXhere) ਰਾਹੀਂ ਪਬਲਿਕ ਡੋਮੇਨ ਵਿੱਚ https://pxhere.com/en/photo/780571

ਲੇਖਕ: ਕੈਸੀਆ ਮੋਰਾਸ

ਇੱਕ ਅਜਿਹੀ ਦੁਨੀਆ ਦੀ ਕਲਪਨਾ ਕਰੋ ਜਿੱਥੇ ਇੱਕ ਅਸਾਧਾਰਨ ਖ਼ਤਰੇ ਨੂੰ ਨਜਰਅੰਦਾਜ ਕਰਕੇ ਰਾਜਨੀਤਕ ਗੁਟਾਂ ਦੀ ਆਪਸੀ ਲੜਾਈ ਚੱਲ ਰਹੀ ਹੈ। ਇੱਕ ਅਜਿਹਾ ਖ਼ਤਰਾ ਜੋ ਮਾਨਵੀ ਸੀਮਾਵਾਂ ਤੋਂ ਪਰੇ ਪੂਰੀ ਸਭਿਅਤਾ ਦੇ ਉੱਤੇ ਮੰਡਰਾ ਰਿਹਾ ਹੈ।

14 ਅਪ੍ਰੈਲ ਨੂੰ ਪ੍ਰਸਾਰਿਤ ਹੋਣ ਵਾਲੀ ਗੇਮ ਆਫ਼ ਥਰੋਨਜ ਦੀ ਅਗਾਮੀ ਕੜੀ ਨੂੰ ਇਸ ਕਥਾਨਕ ਰਾਹੀਂ ਸਮਝਿਆ ਜਾ ਸਕਦਾ ਹੈ। ਲਾਸ਼ਾਂ ਦੀ ਫੌਜ ਦੀਵਾਰ ਤੋੜ ਚੁੱਕੀ ਹੈ। ਹੁਣ ਵੇਸਟੇਰੋਸ ਦੀ ਕਿਸਮਤ ਸਮੇਂ ਦੀ ਦੀਵਾਰ ਤੇ ਲਿਖੀ ਜਾ ਚੁੱਕੀ ਹੈ। ਇਸ ਤੋਂ  ਮੌਜੂਦਾ ਰਾਜਨੀਤੀ ਵੀ ਸਮਝੀ ਜਾ ਸਕਦੀ ਹੈ ਜਿੱਥੇ ਡੋਨਾਲਡ ਟਰੰਪ ਅਤੇ ਜੇਰ  ਬੋਲਸੋਨਾਰੋ ਵਰਗੇ ਨੇਤਾ ਵੱਡੇ ਖ਼ਤਰੇ ਤੋਂ ਬੇਖ਼ਬਰ ਬਹੁਪਾਸੜਵਾਦ ਦੇ ਖਿਲਾਫ਼ ਉਸ ਵਕਤ  ਆਪਣਾ ਮੋਰਚਾ ਖੋਲ੍ਹੀ ਬੈਠੇ ਹਨ ਜਦੋਂ ਸਾਨੂੰ ਇਸ ਦੀ ਅਤਿਅੰਤ ਲੋੜ ਹੈ। ਜਦੋਂ ਸਾਡੇ ਸਾਹਮਣੇ ਵਾਤਾਵਰਣ ਦਾ ਖ਼ਤਰਾ ਸਾਨੂੰ ਨਿਗਲਣ ਨੂੰ ਤਿਆਰ ਖੜਾ ਹੈ ਤਾਂ ਅਜਿਹੇ ਨੇਤਾ ਪੁਰਾਣੀਆਂ ਤਾਨਾਸ਼ਾਹੀਆਂ ਦੀਆਂ ਵਡਿਆਈਆਂ  ਅਤੇ ਧਨ-ਕੁਬੇਰਾਂ ਦੀ ਰੱਖਿਆ ਲਈ ਬਣਾਈਆਂ ਜਾਣ ਵਾਲੀਆਂ ਦੀਵਾਰਾਂ ਵਰਗੇ ਮੁੱਦਿਆਂ ਨਾਲ ਅਸਲ ਸਮੱਸਿਆਵਾਂ ਤੋਂ ਧਿਆਨ ਭਟਕਾਇਆ ਜਾ ਰਿਹਾ ਹੈ।

ਐਚਬੀਓ ਦੁਆਰਾ ਨਿਰਮਿਤ ਇਸ ਲੜੀ ਵਿੱਚ ਵੇਸਟੇਰੋਸ ਦੀ ਰੱਖਿਆ ਵਿੱਚ ਕਈ ਗੌਰਵਸ਼ਾਲੀ ਰਾਜਘਰਾਣੇ ਤਬਾਹ ਹੋ ਜਾਂਦੇ ਹਨ। ਸਾਡੀ ਇਸ ਦੁਨੀਆ ਵਿੱਚ ਵੀ ਹਾਲਤ ਬਹੁਤੇ ਵੱਖ ਨਹੀਂ ਹਨ। ਪਰਿਆਵਰਣ ਦੀ ਬਦਹਾਲੀ ਲਈ ਇਤਿਹਾਸਿਕ ਤੌਰ ਤੇ  ਜ਼ਿੰਮੇਦਾਰ ਅਜੋਕੇ ਵਿਕਸਿਤ ਦੇਸ਼ ਆਪਣੀਆਂ ਗਤੀਵਿਧੀਆਂ ਦੀ ਜਵਾਬਦੇਹੀ ਤੋਂ ਮੁਨਕਰ ਹੈ ਤਾਂ ਚੀਨ ਵਰਗਾ ਨਵਾਂ ਉਭਰਦਾ ਸ਼ਕਤੀ-ਕੇਂਦਰ ਇਨ੍ਹਾਂ ਦੇ ਇਸ ਰਵਈਏ ਦੀ ਆੜ ਵਿੱਚ ਅੱਜ ਗਰੀਨ-ਹਾਉਸ ਗੈਸ ਉਤਪਾਦਨ ਵਿੱਚ ਸਿਖਰਾਂ ਛੂਹਣ ਲੱਗਾ ਹੈ। ਇਹ ਗੱਲ ਠੀਕ ਹੈ ਕਿ ਸਮੂਹਿਕ ਜਵਾਬਦੇਹੀ ਦੇ ਸਿਧਾਂਤ ਦੇ ਆਧਾਰ ਉੱਤੇ ਵਿਕਾਸ਼ਸੀਲ ਦੇਸ਼ ਆਪਣੀ ਗਤੀਵਿਧੀਆਂ ਨੂੰ ਠੀਕ ਠਹਿਰਾ ਸਕਦੇ ਹਨ ਪਰ ਜੇ ਅਸੀਂ ਗਲੋਬਲ ਕਮਿਊਨਟੀ ਵਜੋਂ ਜਲਵਾਯੂ ਤਬਦੀਲੀ ਨਾਲ ਨਜਿੱਠਣ ਵਿਚ ਅਸਫਲ ਰਹਿੰਦੇ ਹਾਂ ਤਾਂ ਇਸ ਦੀ ਵਜ੍ਹਾ ਨਾਲ ਢਹਿਣ ਵਾਲੀ ਆਫਤ ਇਨ੍ਹਾਂ ਦੇ ਲਈ ਵੀ ਓਨੀ ਹੀ ਹਾਨੀਕਾਰਕ ਸਾਬਤ ਹੋਵੇਗੀ। ਸਫ਼ੇਦ ਵਾਕਰਾਂ ਦੀ ਉਪਮਾ ਨਾਲ ਵਿਅਕਤੀ-ਕੇਂਦਰਤ ਮੁਨਾਫ਼ੇ ਨੂੰ ਵੱਧ ਤੋਂ ਵੱਧ ਕਰਨ ਲਈ ਅਪਣਾਈ ਜਾਣੀ ਵਾਲੀ ਕੈਦੀ ਦੀ ਦੁਬਿਧਾ ਰਣਨੀਤੀ ਦਾ ਭਰਮਜਾਲ ਸੌਖ ਨਾਲ ਸਮਝਿਆ ਜਾ ਸਕਦਾ ਹੈ। ਜੇਕਰ ਸਫ਼ੇਦ ਵਾਕਰਾਂ ਦੇ ਖਿਲਾਫ ਵੇਸਟੇਰੋਸ ਦੀ ਹਾਰ ਹੁੰਦੀ ਹੈ ਤਾਂ ਸਰਸੀ ਜਾਂ ਕਿਸੇ ਹੋਰ ਦੇ ਬੈਠਣ ਲਈ ਕੋਈ ਰਾਜਗੱਦੀ ਨਹੀਂ ਹੋਵੇਗੀ।

ਅਜਿਹੀ ਕੀ ਵਜ੍ਹਾ ਹੈ ਕਿ ਦੀਵਾਰ ਦੇ ਉੱਤਰ ਵਲੋਂ ਮੰਡਰਾ ਰਹੇ ਖ਼ਤਰੇ ਦੇ ਖਿਲਾਫ ਸਾਰੇ ਵੇਸਟੇਰੋਸੀ ਇੱਕਜੁਟ ਨਹੀਂ ਹਨ? ਦਲੀਲ਼ ਦਿੱਤੀ ਜਾ ਸਕਦੀ ਹੈ ਕਿ ਆਪਣੇ ਪੂਰਵਜਾਂ ਦੇ ਅਨੁਭਵ ਤੋਂ ਪਰੇ ਅਜਿਹੇ ਕਿਸੇ ਖ਼ਤਰੇ ਨੂੰ, ਜਿਸ ਦਾ ਸਾਹਮਣਾ ਅੱਜ ਤੱਕ ਕਦੇ  ਕੀਤਾ  ਹੀ ਨਹੀਂ, ਸਮਝਣਾ ਮੁਸ਼ਕਲ ਹੁੰਦਾ ਹੈ। ਸ਼ਾਇਦ ਇਹੀ ਵਜ੍ਹਾ ਸੀ ਕਿ ਜੌਨ ਸਨੋ ਨੇ ਆਪਣੀ ਜ਼ਿੰਦਗੀ ਖ਼ਤਰੇ ਵਿੱਚ ਪਾ ਕੇ ਇੱਕ ‘ਜਿੰਦਾ’ ਸਫ਼ੇਦ ਵਾਕਰ ( ਜੇਕਰ ਅਜਿਹਾ ਕੁੱਝ ਹੁੰਦਾ ਹੈ ਤਾਂ) ਨੂੰ ਫੜਨ ਦੀ ਜਹਿਮਤ ਉਠਾਈ।  ਧਾਰਾਵਾਹਿਕ ਦੀ ਪਟਕਥਾ ਵਿੱਚ ਦੌਨ ਕੀਹੋਤੇ ਦੀ ਛਵੀ ਵਿੱਚ ਕ਼ੈਦ ਜੌਨ ਸਨੋ ਸ਼ਾਇਦ ਆਪਣੀ ਇਸ ਕੋਸ਼ਿਸ਼ ਨਾਲ ਆਪਣੇ ਪੱਖ ਵਿੱਚ ਰਾਜਨੀਤਕ ਏਕਾ ਬਣਾਉਣ ਦੀ ਕੋਸ਼ਿਸ਼ ਕਰ ਰਿਹਾ ਸੀ। ਭਲਾ ਕੋਈ ਕਿਸੇ ਜਿੰਦਾ ਪ੍ਰਾਣੀ ਨੂੰ ਉਸ ਦੁਆਰਾ ਕੱਟੇ ਜਾਣ ਦੇ ਬਾਅਦ ਉਸਦੀ ਹਾਜ਼ਰੀ ਨੂੰ ਕਿਵੇਂ ਨਕਾਰੇਗਾ?

ਇਹ ਵੇਖਣਾ ਦਿਲਚਸਪ ਹੋਵੇਗਾ ਕਿ ਸਫੇਦ ਵਾਕਰਾਂ ਦੀ ਹੋਂਦ ਜਾਂ ਖ਼ਤਰਨਾਕਤਾ ਸਾਬਤ ਹੋਣ ਦੇ ਬਾਅਦ ਲੋਕਾਂ ਦੇ ਵਤੀਰੇ ਵਿੱਚ ਕੀ ਬਦਲਾਓ ਆਉਂਦਾ ਹੈ। ਮੂਲ ਰੂਪ ਵਲੋਂ ਤਿੰਨ ਤਰ੍ਹਾਂ ਦੀ ਪ੍ਰਤੀਕਿਰਿਆ ਦੇਖੀ ਜਾ ਸਕਦੀ ਹੈ , ਜਿਸ ਨੂੰ ਅਸੀ ਮੌਜੂਦਾ ਵਾਤਾਵਰਣ ਨੂੰ ਖ਼ਤਰੇ ਦੇ ਸੰਦਰਭ ਵਿੱਚ ਵੀ ਵੇਖ ਸਕਦੇ ਹਾਂ।

1. ਸਮੱਸਿਆ-ਨਿਵਾਰਕ ਪਹੁੰਚ 

ਸ਼ਾਇਦ ਹੁਣ ਤੱਕ ਤੁਹਾਨੂੰ ਸਫੇਦ ਵਾਕਰਾਂ ( ਜਾਂ ਵਾਤਾਵਰਣ ਦੀ ਸਮੱਸਿਆ) ਉੱਤੇ ਵਿਸ਼ਵਾਸ ਨਹੀਂ ਸੀ ਜਾਂ ਤੁਸੀਂ ਉਸਨੂੰ ਬਹੁਤ ਘਟਾ ਕੇ ਦੇਖਦੇ ਸੀ, ਪਰ ਹੁਣ ਜਦੋਂ ਕਿ ਸਚਾਈ ਤੁਹਾਡੇ ਸਾਹਮਣੇ ਹੈ ਤਾਂ ਤੁਸੀ ਉਨ੍ਹਾਂ ਦੇ ਖ਼ਤਰੇ ਨੂੰ ਭਾਂਪਦੇ ਹੋਏ ਆਪਣੇ ਫ਼ੈਸਲਿਆਂ ਉੱਤੇ ਦੁਬਾਰਾ ਵਿਚਾਰ ਕਰਨ ਲਈ ਮਜਬੂਰ ਹੋ ਗਏ। ਇਹੀ ਹਾਲ ਡੇਨੇਰਿਸ ਟਾਰਗੇਰਿਅਨ ਦਾ ਹੈ , ਜਿਸਨੇ ਗੱਦੀ ਦੀ ਆਪਣੀ ਚਾਹਤ ਨੂੰ ਫਿਲਹਾਲ ਦਰਕਿਨਾਰ ਕਰਦੇ ਹੋਏ ਸਾਹਮਣੇ ਆਏ ਫੌਰੀ ਸੰਕਟ ਵੱਲ ਤਵੱਜੋ ਦਿੱਤੀ।  ਇਹੀ ਚੋਣ ਜੇਮੀ ਲੈਨਿਸਟਰ ਨੇ ਵੀ ਕੀਤੀ।  ਭੈਣ ਦੇ ਪ੍ਰਤੀ ਆਪਣੀ ਸਦੀਵੀ ਵਫਾਦਾਰੀ ਨੂੰ ਸਰਬੱਤ ਦੇ ਭਲੇ ਲਈ ਛੱਡਦੇ ਹੋਏ ਮੌਜੂਦਾ ਖ਼ਤਰੇ ਨਾਲ ਨਿੱਬੜਨ ਲਈ ਉਸਨੇ ਆਪਣੇ ਪੁਰਾਣੇ ਦੁਸ਼ਮਣਾਂ ਦੇ ਨਾਲ ਗੱਠਜੋੜ ਕਰ ਲਿਆ। ਇਸੇ ਲੜੀ ਵਿੱਚ ਜੌਨ ਸਨੋ ਨੇ ਇੱਕ ਕਦਮ ਹੋਰ ਅੱਗੇ ਵਧਾਉਂਦੇ ਹੋਏ ਆਪਣੇ ਦੁਸ਼ਮਣਾਂ ਨੂੰ ਸਫੇਦ ਵਾਕਰ  ਮਾਰਨ ਦੀ ਤਰਕੀਬ ਸਿਖਾਉਂਦਾ ਹੈ। ਅਸਲ ਜਿੰਦਗੀ ਵਿੱਚ ਏਲੋਨ ਮਸਕ ਦੁਆਰਾ ਆਪਣੇ ਸਾਰੇ ਟੇਸਲਾ ਪੇਟੈਂਟ ਛੱਡ ਦੇਣਾ ਇਹੀ ਸਾਬਤ ਕਰਦਾ ਹੈ ਕਿ ਬਦਹਾਲ ਦੁਨੀਆ ਵਿੱਚ ਕਿਸੇ ਨੂੰ ਕੋਈ ਪ੍ਰਤੀਯੋਗੀ ਫਾਇਦਾ ਨਹੀਂ ਹੋ ਸਕਦਾ ਜੋ ਜੋ ਬਚਿਆ ਰਹਿ ਸਕੇ।

2. ਗੱਠਜੋੜ ਵਿੱਚ ਸ਼ਾਮਿਲ ਨਾ ਹੋਣਾ 

ਉਪਰੋਕਤ ਕਿਰਦਾਰਾਂ ਦੀ ਤਰ੍ਹਾਂ ਹੀ ਯੂਰੋਨ ਗਰੇਜੋਏ ਦਾ ਵੀ ਆਪਣਾ ਇੱਕ ਨਜ਼ਰੀਆ ਹੈ। ਇੱਕ ਸਫੇਦ ਵਾਕਰ ਨਾਲ ਟੱਕਰ ਦੇ ਬਾਅਦ ਉਸਦੇ  ਸੰਸਾਰ ਦ੍ਰਿਸ਼ਟੀਕੋਣ ਅਤੇ ਪ੍ਰਾਥਮਿਕਤਾਵਾਂ ਵਿੱਚ ਖ਼ਾਸੀਆਂ ਤਬਦੀਲੀ ਆਈਆਂ ਸਨ। ਇਸ ਦੇ ਬਾਵਜੂਦ ਉਸਨੇ ਡੇਨੇਰਿਸ ਟਾਰਗੇਰੀਦੇ ਅਗਵਾਈ ਵਾਲੀ ਫੌਜ ਵਿੱਚ ਸ਼ਾਮਿਲ ਹੋਣਾ ਉਚਿਤ ਨਹੀਂ ਸਮਝਿਆ। ਜਦੋਂ ਜੌਨ ਸਨੋ ਨੇ ਇਹ ਸਾਬਤ ਕਰ ਦਿੱਤਾ ਕਿ ਸਫੇਦ ਵਾਕਰ ਤੈਰ ਨਹੀਂ ਸਕਦੇ  ਤਾਂ ਉਸਨੇ ਸਰਸੀ ਅਤੇ ਹੋਰ ਸਭਨਾਂ ਨੂੰ ਛੱਡਕੇ ਆਪਣੇ ਟਾਪੂ ਉੱਤੇ ਵਾਪਸ ਜਾਣ ਦਾ ਫੈਸਲਾ ਕੀਤਾ ਜਿੱਥੇ ਉਹ ਮੁਰਦਿਆਂ ਦੀ ਫੌਜ ਤੋਂ ਸੁਰੱਖਿਅਤ ਰਹਿ ਸਕਦਾ ਹੈ। ਇੰਨਾ ਹੀ ਨਹੀਂ ਸਗੋਂ ਉਹ ਡੇਨੇਰਿਸ ਨੂੰ ਵੀ ਇਹੀ ਸਲਾਹ ਦਿੰਦਾ ਹੈ ਅਤੇ ਕਹਿੰਦਾ ਹੈ ਕਿ ਜਦੋਂ ਇਹ ਸੰਕਟ ਟਲ ਜਾਵੇਗਾ ਤਾਂ ਉਹ ਦੋਨੋਂ ਦੁਨੀਆ ਉੱਤੇ ਹਕੂਮਤ ਕਰ ਸਕਦੇ ਸਨ।

ਲੇਕਿਨ ਕੀ ਤੱਦ ਤੱਕ ਦੁਨੀਆ ਵਿੱਚ ਅਜਿਹਾ ਕੁੱਝ ਬਚੇਗਾ ਜਿਸ ਉੱਤੇ ਹਕੂਮਤ ਕੀਤੀ ਜਾ ਸਕੇ?

ਅਸੀਂ ਹੁਣ ਵਾਤਾਵਰਣ ਅਤੇ ਸਮੂਹਕ ਸਹਿਚਾਰ ਦੀ ਆਪਣੀ ਤਮਸ਼ੀਲ ਉੱਤੇ ਵਾਪਸ ਆਉਂਦੇ ਹਾਂ।  ਅਮਰੀਕਾ ਜਾਂ ਬਰਾਜ਼ੀਲ ਵਰਗੇ ਦੇਸ਼ਾਂ ਨੂੰ ਟਵਾਲੂ ਜਾਂ ਪ੍ਰਸ਼ਾਂਤ ਮਹਾਸਾਗਰ ਦੇ ਹੋਰ ਟਾਪੂਆਂ ਦੀ ਤੁਲਣਾ ਵਿੱਚ ਗੁਆਉਣ ਲਈ ਜ਼ਿਆਦਾ ਕੁੱਝ ਨਹੀਂ ਹੈ। ਪਰ ਇਹ ਵਿਸ਼ਵਾਸ ਕਰਨਾ ਇੱਕ ਭੁਲੇਖਾ ਹੈ ਕਿ ਉਹ ਜਲਵਾਯੂ ਤਬਦੀਲੀ ਦੇ ਪ੍ਰਭਾਵਾਂ ਤੋਂ ਬਚੇ ਰਹਿ ਸਕਣਗੇ। ਕੋਈ ਵੀ ਨਹੀਂ ਬਚ ਸਕੇਗਾ।

3. ਮੈਨੂੰ ਠੰਡ ਤੋਂ ਕਦੇ ਸਮੱਸਿਆ ਨਹੀਂ ਰਹੀ

ਸਰਸੀ ਇਹ ਮੰਨਦੀ ਹੈ ਕਿ ਜਦੋਂ ਬਾਕੀ ਦੁਨੀਆ ਠੰਡ ਨਾਲ ਮਰ ਰਹੀ ਹੋਵੇਗੀ ਤਾਂ ਉਸਦੀ ਸ਼ਕਤੀ ਨਾ ਕੇਵਲ ਅਖੰਡਤ ਰਹੇਗੀ ਸਗੋਂ ਵੱਧ ਜਾਵੇਗੀ। ਉਸਨੇ ਨਾ ਕੇਵਲ ਗੱਠਜੋੜ ਦਾ ਹਿੱਸਾ ਬਣਨ ਤੋਂ ਮੁਨਕਰ ਹੈ ਸਗੋਂ ਨਿੱਕੇ ਨਿੱਕੇ ਫਾਇਦਿਆਂ ਲਈ ਉਹ ਉਨ੍ਹਾਂ ਉੱਤੇ ਹਮਲਾ ਕਰਨ ਦੀ ਯੋਜਨਾ ਬਣਾ ਰਹੀ ਹੈ। ਪਥਰਾਟ ਬਾਲਣ ਨਾਲ ਚਲਣ ਵਾਲੇ ਆਪਣੇ ਉਦਯੋਗਾਂ ਨੂੰ ਬਚਾਉਣ ਲਈ ਰੂਸ ਅਤੇ ਸਊਦੀ ਅਰਬ ਵਰਗੇ ਦੇਸ਼ ਵੀ ਅੰਤਰਰਾਸ਼ਟਰੀ ਗੱਠਜੋੜ ਦਾ ਵਿਰੋਧ ਕਰਦੇ ਰਹੇ ਹਨ। ਉਨ੍ਹਾਂ ਦੇ ਇਸ ਫ਼ੈਸਲਾ ਨਾਲ ਕੁੱਝ ਸਮੇਂ ਲਈ ਉਨ੍ਹਾਂ ਦੀ ਮਾਲੀ ਹਾਲਤ ਮਜਬੂਤ ਜ਼ਰੂਰ ਹੋ ਸਕਦੀ ਹੈ ਪਰ ਇਸ ਨਾਲ ਵਧ ਰਹੇ ਵਾਤਾਵਰਣ ਸੰਕਟ ਦੇ ਚਪੇਟ ਵਿੱਚ ਆਏ ਉਨ੍ਹਾਂ ਦੇ ਲੋਕਾਂ ਨੂੰ ਪਥਰਾਟ ਬਾਲਣ ਸੁਰੱਖਿਅਤ ਨਹੀਂ ਰੱਖ ਸਕਣਗੇ।

ਸਫੇਦ ਵਾਕਰ ਅਤੇ ਜਲਵਾਯੂ ਤਬਦੀਲੀ ਦੇ ਵਿਚਕਾਰ ਇਕ ਹੋਰ ਸਮਾਨਤਾ ਉਨ੍ਹਾਂ ਦੇ ਹਮਲਿਆਂ ਦੀ ਅਨਿਸ਼ਚਿਤਤਾ ਹੈ। ਦੋਨੋਂ ਹੀ ਸੰਕਟਾਂ ਤੋਂ ਅਸੀਂ ਵਾਕਫ਼ ਨਹੀਂ ਹਾਂ ਅਤੇ ਉਨ੍ਹਾਂ ਨਾਲ ਨਿਪਟਣ ਲਈ ਸਾਡੇ ਕੋਲ ਸਮੇਂ ਦੀ ਬੇਹੱਦ ਕਮੀ ਹੈ। ਪਿਛਲੇ 25 ਸਾਲਾਂ ਤੋਂ ਸੰਯੁਕਤ ਰਾਸ਼ਟਰ ਦੀਆਂ ਸਭਾਵਾਂ ਵਿੱਚ ਸ਼ਾਮਿਲ ਹੋ ਰਹੇ ਸੰਸਾਰ ਆਗੂਆਂ ਉੱਤੇ ਹੁਣ ਸਕੂਲੀ ਬੱਚਿਆਂ ਵਲੋਂ ਬਹਿਸਬਾਜ਼ੀ ਛਡ ਕੇ ਕੰਮ ਤੇ ਧਿਆਨ ਦੇਣ ਲਈ ਦਬਾਅ ਬਣਾਇਆ ਜਾ ਰਿਹਾ ਹੈ। ਬਰਾਜ਼ੀਲ ਨੇ ਅਗਲੀ ਵਾਰਸ਼ਿਕ ਬੈਠਕ ਦੀ ਆਪਣੀ ਮੇਜਬਾਨੀ ਤੋਂ ਵੀ ਮਨਾਹੀ ਕਰ ਦਿੱਤੀ ਹੈ ਅਤੇ ਇਸ ਤਰ੍ਹਾਂ ਨਿਵੇਸ਼ਾਂ ਅਤੇ ਸਾਂਝੇ ਉਪਰਾਲਿਆਂ ਅਤੇ ਮੌਕਿਆਂ ਦਾ ਬੂਹਾ ਬੰਦ ਹੋ ਗਿਆ ਹੈ।

ਗੇਮ ਆਫ਼ ਥਰੋਨਜ ਤੋਂ ਅਸੀਂ ਸਮਝ ਸਕਦੇ ਹਾਂ ਕਿ ਜੇਕਰ ਬੱਚਿਆਂ ਦੀ ਪੁਕਾਰ ਨਜਰਅੰਦਾਜ ਕੀਤੀ ਗਈ ਤਾਂ ਅੰਜਾਮ ਕਿੰਨੇ ਭਿਆਨਕ ਹੋ ਸਕਦੇ ਹਾਂ। ਜਿਵੇਂ ਹੀ ਡੇਨੇਰਿਸ ਦਾ ਇੱਕ ਡਰੈਗਨ ਨਾਈਟ ਕਿੰਗ ਦੇ ਕਬਜੇ  ਵਿੱਚ ਆਉਂਦਾ ਹੈ ਉਂਜ ਹੀ ਮੁਰਦਿਆਂ ਦੀ ਫੌਜ ਦੀ ਸ਼ਕਤੀ ਵਿੱਚ ਬੇਹਿਸਾਬ ਇਜਾਫ਼ਾ ਹੁੰਦਾ ਹੈ। ਇੱਕ ਝਟਕੇ ਵਿੱਚ ਇਸ ਨਾਲ ਪੂਰੀ ਹਾਲਤ ਬਦਲ ਜਾਂਦੀ ਹੈ। ਮੌਤ ਦਾ ਮੰਜਰ ਹੁਣ ਸਾਫ਼ – ਸਾਫ਼ ਸਾਹਮਣੇ ਵਿੱਖ ਰਿਹਾ ਹੈ।

ਇਸੇ ਤਰ੍ਹਾਂ ਵਾਤਾਵਰਣ ਵਿੱਚ ਹੋਣ ਵਾਲੀਆਂ ਤਬਦੀਲੀਆਂ ਨਾਲ ਅਚਾਨਕ ਹਾਲਤ ਇੰਨੀ ਭਿਅੰਕਰ ਹੋ ਸਕਦੀ ਹੈ ਕਿ ਪਿੱਛੇ ਪਰਤਣ ਦੇ ਰਸਤੇ ਹਮੇਸ਼ਾ ਲਈ ਬੰਦ ਹੋ ਜਾਣ। ਗਰਮੀ ਦਾ ਭਵਿੱਖੀ ਪੱਧਰ ਗਲੋਬਲ ਮਾਹੌਲ ਨੂੰ ਉਸ ਬਿੰਦੂ ਤਕ ਧੱਕ ਸਕਦਾ ਹੈ, ਜਿਸ ਨਾਲ ਭੌਤਿਕ ਪ੍ਰਣਾਲੀਆਂ ਵਿਚ ਅਦਿੱਖ ਅਤੇ ਅਮੋੜ ਤਬਦੀਲੀਆਂ ਵਾਪਰ ਸਕਦੀਆਂ ਹਨ। ਇਸ ਅਮਲ ਦੇ ਬਾਰੇ ਵਿੱਚ ਨਿਸ਼ਚਿਤ ਤੌਰ ਕੁੱਝ ਕਹਿ ਸਕਣਾ ਸੰਭਵ ਨਹੀਂ ਹੈ ਪਰ ਧਰਤੀ ਦੇ ਤਾਪਮਾਨ ਵਿੱਚ 1 ਤੋਂ  3 ਡਿਗਰੀ ਤਾਪਮਾਨ ਦੇ ਵਾਧੇ ਨਾਲ ਇਹ ਪ੍ਰਕਿਰਿਆਵਾਂ ਬਹੁਤ ਤੀਖਣ ਹੋ ਸਕਦੀਆਂ ਹਨ। ਸਮੇਂ ਦੇ ਬੀਤਣ ਨਾਲ ਇਹ ਪ੍ਰਕਿਰਿਆਵਾਂ ਹੋਰ ਤੇਜ ਹੋ ਸਕਦੀਆਂ ਹਨ`। ਵਾਤਾਵਰਣ ਵਿੱਚ ਹੋਣ ਵਾਲੀਆਂ ਤਬਦੀਲੀਆਂ ਅਗਲੀਆਂ ਕਈ ਸਦੀਆਂ ਤੱਕ ਬਰਕਰਾਰ ਰਹਿ ਸਕਦੀਆਂ ਹਨ। ਤਾਪਮਾਨ ਵਿੱਚ ਵਾਧੇ ਨਾਲੋ ਅਜਿਹੀ ਹਾਲਤ ਪੈਦਾ ਹੋਵੇਗੀ ਜੋ ਤਾਪਮਾਨ ਵਿੱਚ ਵਾਧੇ ਦੀ ਦਰ ਨੂੰ ਹੋਰ ਤੇਜ ਕਰਨ ਵ ਸਹਾਇਕ ਹੋਵੇਗੀ। ਹੁਣ ਵੀ ਸਮਾਂ ਹੈ ਕਿ ਅਸੀਂ ਅਜਿਹੀਆਂ ਨੀਤੀਆਂ ਨੂੰ ਲਾਗੂ ਕਰਨ ਲਈ ਦਬਾਅ ਬਣਾਈਏ ਜਿਸ ਨਾਲ ਤਬਾਹੀ ਨੂੰ ਰੋਕਿਆ ਜਾ ਸਕੇ ਅਤੇ ਅਜਿਹੀਆਂ ਤਬਦੀਲੀਆਂ  ਨੂੰ ਲਗਾਮ ਪਾਈ ਜਾ ਸਕੇ ਜਿਨ੍ਹਾਂ ਹਮੇਸ਼ਾ ਲਈ ਮਨੁੱਖੀ ਸਭਿਅਤਾ ਦਾ ਅੰਤ ਹੋ ਸਕਦਾ ਹੈ।

 

ਕੈਸੀਆ ਮੋਰਾਸ ਯੂਥ ਕਲਾਇਮੇਟ ਲੀਡਰਸ  (ਵਾਈਸੀਐਲ)ਦੀ ਸੀਈਓ ਅਤੇ ਸੰਸਥਾਪਕ ਹੈ । ਉਸ ਨੇ ਅਤੇ ਕੋਲੰਬੀਆ ਯੂਨੀਵਰਸਿਟੀ  ਤੋਂ  ਐਮਪੀਏ ਦੀ ਡਿਗਰੀ ਹਾਸਲ ਕੀਤੀ ਹੈ ਅਤੇ ਹੁਣੇ ਰੀਓ ਡੀ ਜਨੇਰੀਓ ਵਿੱਚ ਲੇਮੈਨ ਫੇਲੋ ਬੋਰਡ ਦੀ ਮੈਂਬਰ ਹੈ।  2019 ਦੇ ਯੂਥ ਫ਼ੈਲੋਜ ਲੀਡਰਸ ਇਮਰਸ਼ਨ ਪਰੋਗਰਾਮ ਦੇ ਬਾਰੇ ਵਿੱਚ  ਹੋਰ ਜਾਣਨ ਲਈ  ਇੱਥੇ ਕਲਿਕ ਕਰੋ

ਚਰਚਾ ਸ਼ੁਰੂ ਕਰੋ

ਲੇਖਕ, ਕਿਰਪਾ ਕਰਕੇ ਲਾਗ ਇਨ »

ਦਿਸ਼ਾ ਨਿਰਦੇਸ਼

  • ਸਾਰੀਆਂ ਟਿੱਪਣੀਆਂ ਦੀਆਂ ਸੰਚਾਲਕ ਵੱਲੋਂ ਸਮੀਖਿਆ ਕੀਤੀ ਜਾਂਦੀ ਹੈ. ਆਪਣੀ ਟਿੱਪਣੀ ਇਕ ਤੋਂ ਵੱਧ ਦਰਜ ਨਾ ਕਰੋ ਜਾਂ ਇਸ ਨੂੰ ਸਪੈਮ ਦੇ ਤੌਰ ਤੇ ਪਛਾਣਿਆ ਜਾ ਸਕਦਾ ਹੈ.
  • ਕਿਰਪਾ ਕਰਕੇ ਹੋਰਨਾਂ ਨਾਲ ਆਦਰ ਨਾਲ ਪੇਸ਼ ਆਓ. ਨਫ਼ਰਤ ਵਾਲੇ ਭਾਸ਼ਣ, ਅਸ਼ਲੀਲਤਾ ਅਤੇ ਨਿੱਜੀ ਹਮਲੇ ਰੱਖਣ ਵਾਲੀਆਂ ਟਿੱਪਣੀਆਂ ਨੂੰ ਪ੍ਰਵਾਨਗੀ ਨਹੀਂ ਦਿੱਤੀ ਜਾਵੇਗੀ.